Hevpeyvîn

DİVÊ HELWESTA RÊBERTÎ BİBE HELWESTA ME HEMÛYAN

Amadekar: Nûjiyan Erhan   Nêzî şeş mehe di encama tecrîda girankirî ya li Îmraliyê, bi Rêbertî re hevdîtîn nayê çêkirin. Hefteya borî birayê Rêberê gelê Kurd, Mehmed Ocalan çu grava Îmraliyê, lê belê Rêber APO hevdîtîn di cih de nedît. Bi notekî kin re jî da xuyakirin ku rewşa li wir pir hesas e. Ev yek jî bû sedem ku di nava gelê Kurd û rayagiştî de fikranên ji bo rewşa Rêbertî bêtir bibin. Herwiha bi armanca balê bikişînîn ser rewşa li Îmarliyê ev demeke hemû girtîyên PKK’ê û PAJK’ê hevdîtînên bi malbatên xwe re red kirine û rojiya bê dawî ya bîrçîbûnê dane destpêkirin. Me jî ji bo nêrîna Bizava Azadiya Jinê di derbarê mijarên di rojevê de bigrin, bi endama Kordînasyona PAJK’ê Zaxo Zagros re hevpeyvînek çêkir. N:Erhan: Birêz zagros, piştî şeş mehan birayê Rêbertî çû Îmarliyê ku hevdîtinê çêbike, lê belê Rêbertî hevdîtîn bi sedema hesasbûna rewşê red kir. Hûn vê helwestê çawa dinirxin? Z.Zagros: Demeke dirêje li ser tevgera me di kesayeta Rêbertiya me de polîtîkayên tinekirinê tên meşandin. Em dizanin hercar ku hêzên statûkoperest xwestin gelê Kurd tinebikin destpêkê êrîşê temsîla netewa Kurd ango Rêbertiya me kirin. Her plana xwe li ser Rêber APO dane dest pêkirin. Ji ber ji bo plana wan ya li Kurdistanê pêk bê, Rêbertî li hemberî xwe wek kelema sereke dibînin. Ev hem ji bi Tirkiyê hem jî ji bo hêzên navnetewî wiha ye. Ji ber birdoziya ku Rêber APO dixwaze li Rojhilata Navîn belav bike, li hemberî xwe wek xeterî dibînin. Îro li ser Kurdistanê û li ser Rojhilata Navîn planên nû ketine dewrê. Hêzên derve ji bo planên xwe pêk bînin, dixwazin Tevgera Azadiya Kurd bêdeng bikin. Bi vê armancê AKP jî wek aktor hilbijartine. Hemû armanca AKP’ê jî ewe ku tevger û Rêbertî bînin asta teslîmiyetê û Kurdistanê li gorî berjewendiya xwe bidin şixulandin. Dixwazin Rêber APO jî di wan planên xwe de bikin nava lîstokê. Lê Rêbertiya me heya dawî planên wan derxist zanebûnê û bi sebr û dîrayetekî mezin komployên wan pûç kir. Hemû aliyên wan plangeriyan deşîfre kir. Diyar kir ku wan xwe li ser tasfiyê daye runişkandin û teslîmiyetê ferz dikin. Rêber APO li beramberî vê rewşê xwe ji navberê kişand û got: “Hûn nikarin min bikin amûr ji bo polîtîkayên wisa.” Ji wê demê heya niha hevdîtîn çênebûne. Di konsepta ku li ser Rojhilata Navîn pêk tînin de naxwazin Rêbertî plana wan deşîfre bike û rastiya wan derxîne holê. Lewma hewl didin dengê Rêbertî qut dikin. Armanca qutkirina hevdîtinê ev e. Li Rojhilata Navîn pirsgirêka ‘serok û Rêber’ pir cidî ye. Tê dîtin li herêmê berxwedaniyek mezin heye, lê belê ji ber rêveber tine ye, berxwedana wan piranî encamên tê hêvîkirin nagrin. Rêbertiya me ew valatiya heyî dadigire, tirsa hêzên derve ji vê yekê çavkaniya xwe digre. Yek ji armanca sereke ya qutkirina hevdîtinan jî dixwazin vîna Rêbertî bi van rêbazana bişkînin. Di heman demê de plan dikin qutkirina hevdîtînên bi zagonan qanûnî bikin. Rêbertî ji statuya girtiyê siyasî derxin û wek girtiyekî ji rêzê tenê malbata wî bikare pêre hevdîtinan çê bike. Wiha jî wî dûrî pêvajoya siyasî bihêlin. Bi vî rengî jî dibêjin ku “Em ê wisa bikin ku hemû xwestekên me qebul bike.” Gelek sedem hene ku hiştin Mehmed Ocalan biçê giravê. Ev jî perçeyekî planên wan e. Sedemek jî ew bû ku dixwestin nêrînên Rêbertî di derbarê pêvajoyê de fêm bikin. Helwesta Rêbertî ya herî dawî jî dixwestin bizanin. Di heman demê de gelek bertekên gelê Kurd li hemberî îşkenceya Îmraliyê derketine, xwestin vê helwestê jî nerm bikin. N.E: We jî da diyarkirin ku ev îcazeya hevdîtinê jî perçekî konsepta dewletê ye. Divê tevgera azadiyê û gelê Kurd vê helwesta Rêbertî çawa bixwîne (fêmbike)? Z.Zagros: Rêbertî bi wê helwesta xwe xwest bejê ku “Heke hûn xalên em dixwazin pêk bên cidî negrin û di planên xwe yên tinekirinê de israr bikin, ez li hemberî polîtîkayên we yên qirêj serê xwe natewînim.” Rêbertî heya niha xetekî berxwedanê daye meşandin, bi vê helwesta xwe da nîşandan ku vê xetê berdawam dike û ti tewîzan di derbarê azadiya gel de nade. Rêber APO temsîla nasnameya gele Kurd e. Ji ber wê jî nêzîkatiya ji Rêber APO re nêzikatiya ji gele Kurd re ye. Gele Kurd di sedsala 21’an de bi komkujiyê re rû bi rû ye. Sekna Rêbertî seknekî îsyanê ye, sekna nepejirandina vê rewşê ye. Sekna berxwedanê ye. Dî dîrokê de pir dextên bi vî awayî li hemberî tevgera me pêşketine. Lê belê her bi berxwedanê re, me têkoşîna xwe bilind û xurt kiriye. Îro jî Rebertî da nîşandan ku xeta berxwedanê wê berdewam bike. Di heman demê de hemû girtiyên PKK’ê û PAJK’ê jî rojiya birçîbûna bêdawî dane destpêkirin. Ew jî hevdîtînê red dikin. Divê ev bibe helwesta tevahiya gele Kurd. Ji ber siyaseta îro didin meşandin armanc dike ku dengê gele Kurd qut bike. Li gorî wan Kurdê herî baş Kurdê sexte ye. Yê/ya ku xwe firotiye û bêvîn e. Rêbertî temsîla Kurda/ê ku xwedî nirxên xwe derdikeve, Kurda/ê azad e, kurda/ê xwedî vîn e. Ev helwesta ku îro tê nîşandan berdewamiya helwesta heval Mezlûm, Akîf û Kemal e ku di salên 80’an de nîşandan. Ji ber faşîzma AKP’ê û ya Kenan Evren ti cudabûna wan ji hev tineye. Çawa berxwedaniya wê demê ku li zîndana Amedê pêşket hişt ku faşîzma 12’ê Êlûnê têk biçe, berxwedaniya van rojan jî wê AKP’ê tine bike. Tevgera Azadiyê û gele Kurd divê herkes tevlî vê berxwedaniya ku li Îmraliyê pêşketiyê û hevalên zîndanan dane nîşandan, bibin. N:E: Di vê pêvajoyê de di milekî de hemû siyasetmedarên gele Kurd têne girtin di milekî din de jî kesên wek Kemal Burkay derdixin pêş û didin axaftin, armanca vê siyasetê çi ye? Z.Zagros: Hatina Kemal Burkay ne tasaduf e. AKP’ê di serî de hemû kesên hilbijartî ku temsîla vîna gel dikin girt û xiste girtîgehan. Hevdîtinên bi Rêbertî re qut kir, piştre Kemal Burkay û kesên wek wî anî Tirkiyê. Dixwaze berxwedana gel bişkîne û kesên wisa ku xwe firotine dewletê, wek pêşeng derxin pêşberî gel. Wî wek modelekê datînin ortê. Kurdekî mirar, kurdekî xwefirotî, bêvîn modela wan ku ji bo Kurdan rewa dibînin wiha ye. Îro kesên wek Ensarîoğlu, Hûseyîn Çelîk di wan de çi zanebûna netewî heye? Bûne koleyên AKP’ê. Wîsa jî ji bo berjewendiyên xwe qirkirina li ser gelê me pêk tê, qebûl dikin. Li ber çavên cîhanê ewqas qetlîam tê kirin, ewqas fedakarî têkirin, lê belê tu dimêzînî di milekî din de kesên xayîn jî derdikevin. Dî dîroka Kurdistanê de her berxwedan û xiyanet li kêleka hev meşiyane. Xiyanet wek kurmekî di nava Kurdan de dane avakirin. Çawa ku dibêjin kurmê darê ne li darê be dar nakeve. Heke Kurdên sexte alîkariya desthilatdaran nekin, AKP nikare ti tiştekê bike. Divê em mafê jiyanê di Kurdistanê de nedin kesên wisa. Ji ber ew kesana li ser tinebûna me siyasetê dikin. Divê ew mecal nebînin li Kurdistanê siyaset bikin. Pêwîste ciwanên Kurd nehêlin mirovên wisa bêrûmet lingên xwe yên qirêj deynin Kurdistanê. Ji ber Kurdistan pîroz e, Kurdistan bi xwîna hezaran şehîdên me hatiye şuştin. Ji bo propagandayên reşkirina tevgerê jî amûrên wek rojnameya ‘Zaman’, herwiha kanalên Samanyolu, Ûlke û 7 bi kar tînin. Em dizanin AKP wîjdanê xwe bi pere teqes kiriye. Her tişt bûye tîcaret. Ew kes jî wek malekî bi pere kirîne. Modela ku AKP ji bo Kurdan dîpejirîne modela Kemal Burkay e. N:E: Ez dixwazim li vir xalekî din pirs bikim, di van rojên dawî de Firansa ji bo ‘qedexekirina redkirina qirqirina Ermeniyan’ zagon derxistin û di nava Tirkan de rê li ber nerazîbûnan vekirin, lê belê di milekî din de dengê gelê Kurd ROJ TV jî weşana wê dane sekinandin. Hûn helwesta nakok a Firansayê çawa şîrove dikin? Z.Zagros: Mirov dema rabirdûya hêzên Rojavayî dimêzîne, dibîne ku her dema li ser me êrîş pêşdikeve, pêre êrîşên birdozî jî pêş dikevin. Rola ku hêzên Rojava di kopmloya navnetewî de lîst tê zanîn. ROJ TV ji bo deşîfrekirina gelek siyasetên wan yên qirêj rolekî pir sereke lîstiye û dilîze. Ji ber wê jî hêzên Rojavayî nahêlin dengên bindestan were bihîstin. Piştgiriya ku didin dewleta Tirk ne tenê di vê mijarê de ye. Wekî we got zagona ku ji bo Ermeniyan derxistin jî ne ji bo berjewendiya gelên Ermenî bû. Tenê ji bo ku ji dewleta Tirk hîn zêdetir tewîz bigrin, hîna zêdetir xwestekên xwe pêkbînin wisa tevgeriyan. Nexwe di navbera Tirkiyê û Firansayê de pir nakokiyeke mezin tine ye. Ji ber wê jî di milekî de wek li hev nakin didin nîşandan, di milê din de jî dema mijar dibe xwesteka azadiya gelan dibin yek. Ev hemû beşek planên tasfiyekirinê ye. Ji hev ne qut e. Dixwazin dengê Kurdan qut bikin. Bi bêdengkirina ROJ TV re dixwazin di rayagişti de komkujiya li ser Kurdan tê meşandin, neyê bihîstin. Piştî şerê cîhanê yê duyemîn siyaseta bêstatûhiştina Kurdan ji hêla hêzên Rojava ve bi awayek çalek ketiye meriyetê. Xistina Ermeniyan di rojevê de jî siyaset e. Qurbankirina Kurdan jî siyaseta wan a qirêj e. Jixwe ev komploya îro li ser kurdan didin meşandin, ne întaca AKP’ê ye, ji hêla hêzên Rojava ve pêş dikeve, AKP tenê wê pêk tîne. N:E: Birêz Zagros, herî dawî bangewazî û gotina we ji bo xwendevanên me çi ye? Z.Zagros: Çiqa çapemeniya Tirk şerê psîkolojîk bike û dewletê xurt bide nîşandan jî, ev rojên dawî yê hukûmetê ne. Îdea dikin ku “me PKK qedandiye, hema qediyan!” Ev hemû jî şerê psîkojîk e li ser gel didin meşandin. Bi salane hemû hukûmetan gotin “Em ê xilas bikin” lê di dawiyê de jî bixwe xilas bûn. Îro rastiyek derketiye holê ku PKK tine nabe. Ji ber PKK koka xwe berdaye nava gel. Gel li qadan her roj qîr dike “PKK gel e, gel jî li vir e.” Ev rastiye ji aliyê herkesê/î ve tê qebûlkirin. AKP bi van siyasetna xwe dikuje. Dawiya xwe tîne. Çawa ku Kenan Evren, Tansu Çîller, Mesut Yilmaz û hwd. ketin bin sifirê û PKK li ser piyan ma, dawiya AKP’ê jî ev e. AKP di asta xwe ya herî lewaz de ye. Êrîşên hovane jî çavkaniya xwe ji vir digre. Bi êrîşên li ser ROJ TV, girtina siyasetmedar, hilbijartî, rojnamevan û parêzerên gel û êrîşên leşkerî nekarîn me xillas bikin. Ev rêbaz berê jî hatibûn ceribandin. AKP tişteke nû nake. Li beramberî vê em her diçe xurtir dibin. Valaderxistina wan jî di destên me de ye. Çawa ku me komploya navnetewî vala derxist, bi têkoşînê, bi berxwedanê û bi çalekiyên xwe cardin em dikarin polîtîkayên heyî vala derxin. Di şer de şehadetên ku çêdibin nayê wateya ku em lewaz dibin, berovajî wê bi her şehadetê re kîn û nefreta me zêdetir dibe li hemberî dijmin. Bi şehadeta her hevalê/î re em dilsoziya xwe nû dikin. Hêrsa berxwedanê, hêrsa întîqamê hîna zêdetir dibe. Em hêvîdarin ku berxwedana li Îmraliyê û zîndanan da hatiye destpêkirin roj bi roj derbasî hemû qadan, hemû kolanan û hemû takekesan bibe. Di vê bihara pêşiya me de em ê misoger bidin nîşandan ku gelê Kurd di têkoşîna xwe ya azadiyê de bi israr e û wê bi ser bikeve. N.E: Birêz Zagros, jî bo we dem ji me re veqetand û nêrînên xwe bi xwendevanên me re parvekir, em spasiya we dikin.